講多少少關於酒店業主聯會嗰句「被逼做本地市場」，其實一句說話可以睇得出，香港某些階層的偏見及僵化。
酒店業基本上係好勢利同注重門面的行業，超級白鴿眼。記得以前做酒店，我的上司成日會細聲話我知，邊個客戴隻錶係幾十萬，邊個客用個手袋又十幾萬。我會覺得「關我叉事咩，都係咁做嘢架啦！」但係上司對呢D貴客，明顯態度會殷勤好多，永遠對客的要求唔say no，永遠四萬咁嘅口。
相反，如果係promotion先來的客，即使同事表面上都係咁做嘢，但態度上真係求其好多。更有甚者，喺背後叫D客做「乞兒」，而講緊嘅人，可能只係最前線一個清潔或執房，甚至係炒散。客人身份不同，就算喺同一家酒店，同一等級的plan，受到的待遇都會截然不同。
所謂公司standard，只係有事俾人抽秤時，公司同你講的說話。酒店業係最注重社經階級的行業，對佢哋來講，佢哋的工作就係服務少部份貴客，同應付一大堆「乞兒」。即使嗰班「乞兒」都係俾錢來幫襯，甚至有時係俾足正價。但只要你係「貴客」，就算你要求多多，又俾好多嘢佢哋做，佢哋都做得好心甘情願。
經濟好的日子，所謂的good old days，遊客住客為主，遊客早出晚歸，返來只係沖個涼瞓個覺，好易serve，幾乎只係前台同執房有做嘢啫。而家經濟唔好，佢哋要推出staycation plan吸引本地客。staycation 客專為酒店而來，當然會用盡酒店設施。如此問題就出來了，好多香港酒店的設施，基本上只為爭取星級而備有的門面嘢，設施及服務人數，根本不足以應付大量客人。我記得以前做酒店嗰陣，spa的同事講返，工作其實好清閒，企多過做。因為遊客通常往外跑，好多所謂設施，有就得，用來擺，充撐場面。
但轉型做staycation，成個要求就唔同晒。客人要求設備係滿足到佢哋嘅，慣咗擺門面做樣的設施，突然真正要投入服務，不論硬體及軟體都跟不上，所以業界就嗌晒救命。香港酒店不似澳門，澳門酒店的設計，好多時係預客人留酒店玩成日，所以好重視配套，泳池好靚，餐廳商店多元化，酒吧有真正吸引力而非「有就得」，而且不止高消費人士，而係低消費人士都會考慮到，會有food court之類配套。香港突然要轉，硬體冇可能變得咁快，但管理人手方面都太僵化，轉不過來。
而最令酒店業感到「委屈」的，係要佢哋serve一班佢哋覺得係「乞兒」的人。感覺簡直好似日日俾「乞兒」蹂躪咁，所以先有咁多staycation 客的劣行流出。你估以前D「貴客」唔麻煩咩？要數畸尼嘢，有錢人唔會少得過窮L。但服務有錢人，佢哋心甘命抵，服務「乞兒」？好委屈囉！
就係覺得委屈，先會用「被逼」兩個字，短短兩個字，已經透露出嗰種「虎落平陽被犬欺」的不甘心。否則，唔會咁講嘢。
會點講法？「而家旅遊業寒冬，多得本地客支撐我哋產業，才可以繼續營運。」
呢D唔係識唔識講嘢嘅問題，係根本的偏見改不了。
酒店業主聯會：未通關被迫做本地生意
連續 4 天的國慶中秋連假剛結束。酒店業主聯會執行總幹事李漢城於電台節目中透露，本港整體酒店的入住率在過去 4 天達到 60% 至 70%。不過他指出，本地客並非酒店業的主要收入來源，幫助不大。若一直無法通關，只能被迫繼續做本地市場生意。
他指出本地度假並不能成爲酒店業的主要收入來源，只是「塘水滾塘魚」，幫助並不大。在目前困境下，叫做有收入支付部分人工、燈油火蠟，幫助減少酒店業虧損。若依舊未能通關或局部開放，酒店業只能「被迫繼續做本地市場生意」。因此，他希望政府能盡快推出「健康碼」並恢復正常通關，否則業界經營仍十分困難。
資料網友提供，貼文只供back up用途
來源：網路資料
聲明：以上資料轉載自網絡，僅供參考。
